Qissa-e-aitmaad...!!

Kitne azeez rahe tumhare jaane ke baad

Sham hai tanhayi hai aur tumhari yaad

***

Meri ab tak bhi hairaniya.n kaha.n gayi.n

Kisko sunaye.n jaake ye qissa-e-aitmaad

***

Mai.n wo guzre zamane sab bhuula hu.n

Tum aaye ho ab karne kyo.n daad-o-sitad

***

Ye bhi kya baat rahi, ke har jaanib itlaaf

Idhar mai.n barbaad, udhar tum barbaad

***

Muddaton ke baad hum tumse mile hain

Fasle bahar aayi hai muddaton ke baad

***

koi maafi iltaja bhi lage tumko na-gawaar

Ab toot hi chuka hai jab tumhara aitmaad

***

Kiske sahare jeena hai jab tum hi chal diye

Tanha na mujhko chodiye kar jaiye barbaad

***

Seene se dil nikal ke wo kah rahe hain ab

Na mujhko tujhse wasta hai na koi muraad

*****

Ghazal by : Kavish and Aamir

*****

Usko Soacha...!!!

Jab bhi usko maine soacha jaane kyaa kyaa soacha
Uskii rangat soachii mai.ne uskaa chehraa soacha

wo jo nazar milaayenge to mai.n bhi to muskaau.nga
Dil mei.n ghar kar jaau.n kaise eisa rastaa soacha

mai.n to jahaa.n bhi jaata hu.n bas saath use le chalta hu.n
Gulshan gulshan soacha usko sehraa sehraa soacha

ek shab oar jo aayii thii wo jaau.n jaau.n kahtii hai
Kyaa vadaa tha mai.ne phir se uskaa vadaa soacha

Hosh teraa qaayam kyo.n rehta sach hai kitnaa qaatil hai
bhalaa kiya jo tuune us ko raftaa-raftaa soacha

Khud Se Saari baat jo khulkar ho gayii...!!

Khud se saari baat jo khulkar ho gayii
Dekho tabiyat kitnii behtar ho gayii

Sach zindgii ke saamne aate chale gaye
Jiine kii khwaiish kam se kamtar ho gayii

Naa nazar jhukii naa hii ye dil dhaDka
Itnii baat to khat mei.n likhkar ho gayii

Raahe.n yaro.n pathreeli thi.n aaj bohot
Chalte chalte chaal bhi pat_thar ho gayii

Ye to bataa de kaisii dua dii thii ‘aamir’
Jo Haalat uskii bad se badtar ho gayii

Dil-e-Naatva.n...!!

Samt-e-saahil to shiddat se be-shak jataa hu.n
Jab lehar aati hai peechhe ko sarak jataa hu.n

Haadse kitne merii aankho.n se vaabsta hai.n
Koi bhi majmaa ho, ab mai.n to thithak jataa hu.n

Tuu zindgii hai teraa kaam hai chalte rahnaa
Main hu.n insaan kisi moD bhi thak jataa hu.n

Muddaa koii bhi insaniyat ka yu.n naa rahaa
Aadmii hu.n kahi.n mai.n bhi to behak jataa hu.n

Mujhse naa puuchh abhi kitnaa safar baakii hai
Jahaa.n milte hai.n zameen o falak jataa hu

Girte dekhe hai.n koii roaz puraane bar_Gad
Jab havaa chaltii hai daalii sa lachak jataa hu.n

Ab sukhanwar mai.n kahaau.n to kahaau.n kyo.nkar
Dil mei.n jaisii bhi mere aaye hai bak jataa hu.n

Sunaa hai unke armaano.n ne dam toDaa tha..!!

TaDap-taDap ke Diivaano.n ne dam toDaa tha
Sunaa hai unke armaano.n ne dam toDaa tha

Waqt-e-gardish kii tapish thii jo mere par sulage
Kabhii merii bhi to uDaano.n ne dam toDaa tha

Ye kinaare to wahi.n dekho muskuraate hai.n
Kal jaha.n saikDo tuufaano.n ne dam toDaa tha

Waqt-e-rangiinii mei.n zamaana jinke saath rahaa
Ek viiraane mei.n sultaano.n ne dam toDaa tha

Apnii insaaniyat ko zindaa yaha.n rakhne ko
Ye bataa koun se insaano.n ne dam toDaa tha

Jaane kisne churaa lii...!!

Yaaro.n merii taqdeer thi jaane kisne churaa lii
Khwaabo.n kii taabeer thi jaane kisne churaa lii

Bas ek hii jaageer thi jaane kisne churaa lii
Qismat kii lakeer thii jaane kisne churaa lii

Zamaane mei.n meraa oar to kuchh bhi na hua tha
Yaado.n kii tasveer thi jaane kisne churaa lii

Aaj bhi bhuulaa nahi.n wo shararate.n saarii
Raat baDii Shareer thi jaane kisne churaa lii

Ye bhi sunaa hai tuu baDii khoob ghazal kahtaa tha
Khoob terii tahreer thi jaane kisne churaa lii

Bohot umr tere pyaar ka wo qaidii raha tha
Uskii jo zanjeer thi jaane kisne churaa lii

Shayar agar na hota..!!

Shayar agar na hota to kahiye mai.n kya karta
Apne junu.n se jaane kaise mai.n wafaa karta

Raahgiiro.n kii phabti chupchaap sunaa karta
Tere dar pe paDa hotaa marne kii duaa karta

Shahar kii deevare.n tere naam hii kar detaa
Har raat unpe jaane kyaa kyaa mai.n likha karta

Gar jo guzar jaata tere gham ka kaarwa.n ye
Insaaniyat ke apne kuchh farz adaa karta

Shukr hai ke mai.n to birahman na hua ‘Aamir’
Phir Jeete jii to jalta marr ke bhi jalaa karta

~ Ashaar-o-Qataat ~

Shab-e-gulsita.n kyo.n dil se haTe dasht mei.n

Jab meri - tumhaari har raat kaTe dasht mei.n

aa ham ek duusre ke ashq-e-gham pii ke jiye.

zamzam ke kuchh yu.n bhi baTe dasht mei.n
~~~~~~~~~~~~~~~~~~~~~~~

Kuchh der lutf lijiye in faaslo.n ko jheliye
Deevaar ye taazii hai abhi kyo.n dhakeliye


Dil nahi.n behalta agar tumhara uss taraf
Aaiiye aap yaha.n mere gham se kheliye

~~~~~~~~~~~~~~~~~~~~~~

Tuu bhi to usko yaad kar...!!

Koi to ek aisa jatan tuu bhi dil-e-naashaad kar
Wo nahi.n bhuulaa tujhe tuu bhi to usko yaad kar

Ek khazaana hai bharaa lekin hai khaalii duusra
Sawaab kii hii chaah kar lekin kabhi imdaad kar

Himmat kabhii na haariye ke saans hai to aas hai
Haakim agar sunta nahi.n jallaad se fariyaad kar

Ek Bachchii bolii ye to bhaarii nahi.n hai bhaii hai
ChaDti thi parbat pe jo kandho.n pe usko laad kar*

Panchhi wo sayyaad se to bas yehii kahta rahaa
Par katar de mere tuu yaa phir mujhe aazaad kar
******
*a real story narrated by Mahatama Gandhi

Koun hai yaha.n par wo jiska chaak seena hai..

Koun hai yaha.n par wo, jiskaa chaak seena hai
Uskii aah ne dekho, chain-o-sukoon chheena hai

Uske dard sun kar saare marne kii dua dete hai.n
Oar wo hai kahta dekho, mujhko to abhi jeena hai

Itnaa sharaab-e-ziist mei.n kyo.n nashaa baD gayaa hai
Isko peena bhi hai aisa, roaz zehar peena hai

Na jaane kaha.n hai ab to, ai dil tumhari manzil
Ashqo.n ka ek dariyaa hai, yaado.n ka safeena hai

Behtar yehii hai mouqaa, o aasma.n bulaa le
Mahoul bhii namaazi hai, ramzaan ka maheena hai

Umr jo bhi baaqii hai sab, tere naam likh du.n
Tere bina jeena hai to, mujhko bhi kaha.n jeena hai

Zaraa mousam ye badal jaaye to ro lena...

Zaraa mousam ye badal jaaye to ro lenaa
Dil ka jab haal sambhal jaaye to ro lenaa

Tuu jo roya to kahin chaand bhi ye ro na paDe
Chandni raat ye dhal jaaye to ro lenaa

Suno kuchh der to tham jaao kinaare walo.n
Kashti jab duur nikal jaaye to ro lenaa

Dil-e-masoom ko sambhala hai kaise kaise
Iskii tabiyat jo bahal jaaye to ro lenaa

Fizaa ko kushk hii rahne de ahsaas-e-jigar
Jaltii shamaa jo pighal jaaye to ro lenaa

Isne dekha hai sadaa tujh ko muskuraate hue
Ziist karvat jo badal jaaye to ro lenaa

Nazar Sajde mei.n ho...

Ab Sadaa merii basar sajde mei.n ho
Har ghaDi meri nazar sajde mei.n ho

Havaa yu.n bhi chale imaan kii koii
Har shaakh-o-shajar sajde mei.n ho

Jaa.n nikle jab to yu.n nikle merii
Dil mei.n tuu ho, ye sar sajde mei.n ho

Ab ke aisii bhii koii sahar dekhu.n
Jab ye saara shahar sajde mei.n ho

Ham Nafas Andhera...

Gham mei.n mere saath tha, ham-nafas andhera
Dard mere dekh kitnaa, royaa be-bas andhera

Terii zindgii ka suuraj, kis ne bhigo diyaa
Dekhiye rehtaa hai ab to, kitne baras andhera

Jab se tuune mujh se apnii, nazare.n pheri hai.n
Zindagi lagne lagii hai, mujhko qafas andhera

Usne mere ghar ka haay-haay charagha.n dekh liyaa
Barq ne phir kii shararat, jas-ka-tas andhera

Ab diye bhii uss kii aankho.n ko agar chubhne lage
Kyo.n na kar de Raat pe, kha ke taras andhera

Ab kyaa kahiye...

Yaad uski thi ek bahaana ke ab kya kahiye
Mujh ko tha ashq bahaana ke ab kya kahiye

Jo khuD se hii apnaa pataa maa.nge hai
Kaha.n hai uska thikaana ke ab kya kahiye

Dard tere mujhko bhi bohot chubhte hai.n
Mujhsa hai tera fasaana ke ab kya kahiye

Ab oar haal-e-dil kya sunaau.n yaaro.n
Bas wohi dard puraana ke ab kya kahiye

Roaz milta hai mujhe pehchaanta nahi.n
Ye nayaa hai zamaana ke ab kya kahiye

Saaye ke bhi to Qad badle...

Dekhte-dekhte aalam bhi to kis had badle
Dhoop chaDti gayii saaye ke bhi to qad badle

Kab tak nibhaoge tum, nibhaoge kis tarah
Rishta be-maani jo, Har baat pe sarhad badle

Itne waqfe mei.n, kuchh mai.n to wafadaar hua
Khud ko hi badlu.n ke ab, wo to naa shaayad badle

Kabhi aashiq kabhi qaatil kabhi ghamkhwaar hue
Jab bhi badle mere mehboob to be-had badle

Waqt badla to zamaane ne Nazar pherii hai
Farz badle kaha.n tere kaha.n maqsad badle

Chaand ChaTakne lagaa...

Husn-e-yakta teraa kyo.n-kar use khatakne lagaa
Tera chehraa dekha usne chaand chatakne lagaa

Ab nagri ke saare maikash gaafil rahte hai.n pyare
Jab se tuu khiDki pe aakar zulf jhatakne lagaa

Koi kahe sapera usko to koi kahe matwaala hai
Ek musafir zulfo.n mei.n har shaam bhatakne lagaa

Koshish karke haar jaaoge raaz chhupa na paoge
Jaanu.n ye maiy ka pyaala kab se chhitakne lagaa

Jab se usne sher kii evaz nazar uthaakar dekha hai
Tab se dekho har shaayar ka misra atakne lagaa
***
yakta=matchless

Kyo.n itnaa sharmaate ho....

Kyo.n itnaa sharmaate ho ke khwabo.n tak hii aate ho
Chokhat tak to aate ho phir kis se darr jaate ho

Koi pahar ho, shaam sahar ho naam mera hii lete ho
Naam mera jab aata hai to kyo.n itna ghabraate ho

Meri dastak sun_ne ko to jaane kab tak jagte ho
Jab meri aahat hoti hai to qasdan hii so jaate ho

Joban ek musafir hai jo jaa kar phir na loatega
Jispe tum ithlaate ho oar apno.n ko taDpaate ho

Ek shaam mei.n rang tumhare kitne saare dekhe hai.n
Mujh par tum jhunjlaate ho phir mujhko hii samjhaate ho

Kabhi asha'ar -e- painda nike...

Iss shahar se ek bashindaa nikle
Koi adab ka numaindaa nikle

Kal andhere mei.n jo soacha mai.ne
Khayaal kitne tabindaa nikle

Kuchh iss tarah se amal zoar kare
Tere bhiitar ka darindaa nikle

Wo mehfil se niklaa kho ke khudi
Marr hii jaye jo aaindaa nikle

Jism se jaan yu.n bhi nikle hai
Jaise pinjre se parindaa nikle

Baad marne ke jo talaashi lee
Uske khwaab to zindaa nikle

Mere lafzo.n ka lahu aaye nazar
Kabhi ashaar-e-paindaa nikle
*****

Tabinda-bright
Painda-everlasting

Aashiqi ka aalam...

Ye aashiqi ka aalam bhi to milaa-julaa sa tha
Chhaii thi Ghataa kahi.n aasma.n khulaa sa tha

Mere dil mei.n bhi ishq ka ek bulbulaa sa tha
Uske dar par hii jo jaa.n dene ko tulaa sa tha

Uske khat mei.n to abke ek nayi hii baat thii
Ek Kaghaz kora sa wo bhi dhula dhula sa tha

Unki kam-guftaari to hamne bhi sunii magar
Wo Izhaar-e-tamanna kyo.n napa-tulaa sa tha

Uske andaaz-e-shikwa par hue qurbaan ham
Jiskaa har lafz shiirii.n mei.n ghulaa ghulaa sa tha

tujh ko judaa kaise kahu.n...

Mehfil mei.n khud ko ghamzadaa kaise kahu.n
Duuriya.n laakh sahi tujh ko judaa kaise kahu.n

Ye bhi nahi.n kahtaa ghamo.n se ulfat hai
Mere apne hai.n apno ko buraa kaise kahu.n

Diivaana hu.n par kaafir to nahi.n ho sakta
Butt maine taraashe they khudaa kaise kahu.n

Ye teri mehar hai ke gham se nijaat paayi hai
Ab qaatil tuu hii bataa shukriyaa kaise kahu.n

Koun bhala kahta hai jaha.n mei.n ‘aamir’ tujhko
Bas ek mai.n hu.n tujh se khafaa kaise kahu.n

dard ye hadd se guzar na jaaye kahi.n...

Dard ye hadd se guzar na jaaye kahi.n
Dil kii dhaDkan thahar na jaaye kahi.n

iss darja takraati hai.n aahe.n dekho
Ye aasama.n bikhar na jaaye kahi.n

Kitna dabe paa.nv subaah aatii hai
Shab-e-makhmoor darr na jaaye kahi.n

Ab bahaare.n kabhi loat ke na aaye.ngi
Meri qismat sa.nwar na jaaye kahi.n

Wo beraham khyaalo.n mei.n aate rahe
Meri ummeed marr na jaaye kahi.n

Muddate.n ho gayii.n wo choD gayaa
Par yaad-e-sitamgar na jaaye kahi.n

Hans hans ke raahjan se ye kahta raha
Apne hatho.n ka hunar na jaaye kahi.n

Waqt kii shaakh se lamhe..TM

Tere khayaal agar akela kabhi chhoDa karte
Ham bhi kaghaz pe ye jazbaat nichoDa karte

Abhi kachche hai.n samar* oar zaraa tapne do
Waqt ki shaaKh se lamhe nahi.n toDa karte

Gar pataa hota, hai ye behruupiyo.n ka nagar
Ek naqaab-e-ham-sukhan yaha.n oDa karte

Har taraf zharf* ghutan ho, uspe ek Dard buland
Kisi ko iss moD pe tanha nahi.n ChhoDa karte

Uss masuum se bas ye hii guzaarish thi merii
Sachche aashiq ka kabhi dil nahi.n toDa karte

Jaanta hu.n ke ham-rutbaaii ka hai usool yaha.n
Warna ham bhi to tere dil se dil joDa karte

Zindgi ne sikhlayaa hai sabaq ek yehi mujhko
Biida-e-zindgi* se kabhi muh nahi.n moDa karte
************

*Samar-fruit
*zharf-deep
*biidaa- Responsibility

Unkii Aankho.n mei.n bhalaa- TM

Wo jo chhalke.n to meri aankh bhi DabDaba jaaye hai
Unki aankhon mei.n bhala, kab humse dekha jaaye hai

Tuu mera hamraaz hai khaai thi qasam jhoothi uss din
Raaz–e-gardish kyo.n phir mujhse chhupa jaaye hai

Dard wo dard kaha.n raha jo in ankho se beh nikla
Apni zindgi ki ye, ek daasta.n sa banaa jaaye hai

Mera dil-e-makhmoor phir Lagzish hua to kya bura
Is gham-e-dilkash mei.n to naza koi bhi pa jaye hai

Mai.n hu.n oar mera Safar jo _ Nahi.n hota tamaam
Har subah ek naya hii sahraa, saamne aa jaaye hai
***************

Lagzish-laDkhaDana
Naza- aakhiri saans



----------------------------------------------------

Badal gayi hai ye zami.n...

Badal gayi hai ye zami.n, aasma.n badla hua
Sab kuch badal gaya, jo tuu badla to kya hua

Keysh-e-pesh-o-pas ka yu.n bhi faisala hua
Kuchh fard sard mile, aor ek ghar jala hau

Naya zamana hai, ise sach bhi koun manega
Ye soacha to sach kehne ka phir housla hua

Maine suna hai ke tumhara lahu to surkh hai
Wo malool sahi, tere valvalo.n ko kya hua

Kuchh to tujhse baghawti bhi hue hai.n ‘aamir’
Par wo bhi jo sareer tha kuchh Daba daba hua

************
Sareer-qalam kii awaaz jo likhte waqt aati hai.
Valvale-enthusiasm
Malool-sad

Khamoshi ka hunar...!!

Ye sukuut-e-dil oar meri khaamoshi ka hunar
Haira.n hua dekh ye ham-aaghoshi ka hunar

Tera tasavvur nahi.n to tera gham hi sahi
Bin piye siikha hai ye madhoshi ka hunar

Tuute hue taare mujhe ye to batata ja
Kaha.n se paaya khanabadoshi ka hunar

Kya thiik hai har dar- ko bhigote phirna
Ashqo ko sikhaao parda-poshi ka hunar

Kaise bhuulu.n ahsaan-e-dard ko ‘aamir’
Mujhko aata nahi.n faramoshi ka hunar

Na fikr kar...

Zindgi kyo.n tuu sach sach bataati nahi.n
Na fikr kar mai.n itna-bhi jazbaati nahi.n

Jaane kaha.n kho gayi hai Tawajjoh meri
Phuul se bhi ab koi khushbu aati nahi.n

Phirta hai jo tuur pe dhundhla sa koi
Uss tak meri aawaaz kyo.n jaati nahi.n*

Jis din se bahare.n mujhse ruuthi hai.n
Koi ada-e-sabz-o-gul mujhe bhati nahi.n

Jiske kirdaar hii bewafa afsaane nikle
Wo kahani bhi khud ko dohrati nahi.n

****************
*When Hazrat Musa, compelled by the insistence of his people, went to Mount Tuur and petitioned the Lord Most High, 'Oh Lord, show me Your radiance', he received the reply, 'You cannot look upon it'. When he asked again, a stroke of lightning flashed. The bush of Tuur burned, the mountain of Tuur shuddered in an earthquake. Hazrat Musa fainted and fell to the ground.

Jo khud ko Chahtaa hai....

Bekaar hii apne dil ko, tuu beh-zaar karega
Jo khud ko chahta hai, kya tujhe pyar karega

Tuune jo jazbe hichak hichak ke rakhe they
Un-ka wo tamasha sar-e-bazaar karega

Jitney bhi taalib they, sab khwar ho chuke
Dekhe.n ab koun jurrat-e-diidaar karega

Jis shaad rukh pe tum ja.nisar karte they
Har sahar ab roya wo zaar zaar karega

Jiska junu.n bhi ziist sa berang ho chala
Kis rang ko baya.n wo fankaar karega

Yu.n hii kati hai ‘aamir’ ye umr-e-taweel
Eitbaar karega, ab to wo eitbaar karega

Dheere dheere qareeb aa rahe hai.n wo...(TM)

Khwabo.n mei.n aa-aa ke bulaa rahe hai.n wo
Mujhse bichhadke kyo.n pachhta rahe hai.n wo

Ghabrate they wo khud se baat karne mei.n,
Mumkin hai isi vaaste khafa rahe hai.n wo

Gham ke saaye jo qasr-e-zulmat se baDe,
Dhere dhere qareeb aa rahe hai.n wo

Tasavvur ke farishto.n ke meethe se qisse
Meri udaasiyo.n ko behla rahe hai.n wo

Takra ke loate ye naale to oar bhi mazeed
Jaise uquubat-kade se aa rahe hai.n wo
***
Qasr-e-zulmat=dark palace
Uquubat-kada= Punishment center

Tuune thukrayaa mai.n ho gayaa zamaane ka...

Har bashar qaayal hua gham ke taraane ka
Tuune thukraaya, mai.n ho gaya zamane ka

Ye shaks shuhood-e- mehfil har kahi.n mila
Bas ek bahana dhuundta hai muskurane ka

Zindgi jaane kab guzar gayii dekha nahi.n
Mubtila tha mauqa na-mila sar uthaane ka

Jawab aaye nahi.n to kahiye wo sharmsar hai
Oar kya hai, uzr hai apni khudi bahlaane ka

Bekasi ka takht, oar liye ilzaamo.n ka taaj
Ha.n mai.n hii shahnshah hu.n iss viirane ka

Mujh ko maaf karna wo mai.n hii chura laaya
Na paoge ab aakhiri warqa uss afsaane ka

Dil mei.n liye jo tuu kahi.n ‘aamir’ chala gaya
Koun phir musnnif rahega tere fasaane ka

***
Uzr=excuse
Khudi= ego
Shuhood-presence
Musannif=writer

Ashqo ko sambhalo yaaro.n...

Yu.n mujhko uljhan mei.n na daalo yaro.n
Apne beqaraar ashqo ko sambhalo yaro.n

Jis_se bhi milo tum sirf milo pur-khuluus
Har din ek naya rafeeq tum paalo yaro.n

Jo jins kam mili use ahtiyaat se rakkha
Pyar bhi wohi niyamat hai bachalo yaro.n

Mujhe maluum hai anjaam-e-keysh-e-nafrat
Tum bhi diin-e-mohabbat ko apnalo yaro.n

Sajda kiya hai jisne wo uski aankh ka tara
Kya bura jo tumbhi sar ko jhukalo yaro.n

Viiraanii-e-lamhaat na hogi...

Apnii hii nafs se ab to kabhi baat na hogi
Meri ab khud se bhi koi mulaqaat na hogi

Teri sab shararate.n sang mere phire.ngi,
Dasht mei.n bhi Viiraanii-e-lamhaat na hogi

bouchhro.n se Chhupke khaDe they ham jaha.n
wa.n ab kabhi wo shariir si barsat na hogi

ho jayegi ab meri muraadgarii bhi fanaa
jab tere daras kii bhi koi khairat na hogi

Udta kahi.n hawa ke paro.n pe phire ‘aamir’
Tere ghamo.n se tujhko kabhi nijaat na hogi

Wo jazb-o-meyaar du.n....

Apni sada-e-dard ko kuchh yu.n sa.nwaar du.n
Har bashar ke zehan ko mushki-khumaar du.n

Mera bhi zikr nikle, mehfil mei.n kabhi kabhi
Ghazlo.n mei.n apni wo jazb-o-meyaar du.n

Ye raat jaise gin rahi hai, apni aakhiri saanse
Mai.n bhi kisi bahaane, ye shab guzaar du.n

Karti rahi sawaal ye zindgi kitne ajeeb se
Isko bhi jawaab-e-saed koi kham-daar du.n

Dekh ke Zulmat teri, haira.n hai.n kai shakhs
Zara Idhar to aa zindgi, nazar teri utaar du.n

Mehfilo.n mei.n rang hai...!!

koi aa.nsuo.n mei.n ghir raha hai,
Mehfilo.n mei.n rang hai
Dar badar koi phir raha hai,
Mehfilo.n mei.n rang hai

Ek taraf hai bhuukh roati
Mehfilo.n mei.n rang hai
Maa.n uski daaman bhigoti
Mehfilo.n mei.n rang hai

Chulhe thande ho gaye
Mehfilo.n mei.n rang hai
Bachche bhuukhe so gaye
Mehilo.n mei.n rang hai

Raat kii hai saa.ns tuuti
Mehfilo.n mei.n rang hai
Meri dil kii aas chhuuti
Mehilo.n mei.n rang hai

diida-e-tarr zyadaa hai...

Biite lamho.n ka kahi.n zikr agar zyada hai
Ye to hona hii tha, diida-e-Tarr zyada hai

Yu.n to koi bhi nahi.n duniya.n mei.n pur suku.n
Hujuum-e-gham kuchh mere ghar zyada hai

kyo.n chiDae zahik misl-e-azm keh kehke
Pao.n ghayal hai.n, aziiyat-e-safar zyada hai

Khud kii ruswaii, ya mujhse juda ho jana
Keh to do tum ko kis baat ka dar zyada hai

Kisine Dua di to kisi ne bad-dua bhi di hai
Ab dekhna hai ke kis_me asar zyada hai


**************
misl-e-azm = example of Strength
Aziiyat-e-safar=difficulties in travel
Zahik=mocker

Oar kyaa sach hai bas mout oar khuda ke siwa...

Maine kya ma.nga tha bas ek wafa ke siwa
Mila na kuchh bhi ek nazar-e-khafa ke siwa

Milega kya tujhe ek ujle se Qaba* ke siwa
Oar kya sach hai bas mout oar khuda ke siwa

Mujhko shiishaa-o-paimaanaa dikhao kyo.n kar
Oar kuchh chahiye iss Dard kii dawa ke siwa

Kis tarah tuune zindgi uss roaz mu.n phera tha
Sab kuchh bhuula hu.n teri uss ada ke siwa

Amal-e-duniya hai par teri fitrat nahi.n ‘aamir’
Bhuulna sab kuch apne Dard-o-aza ke siwa




*refered ‘kafan’

Wo diiwaar saaf dikhtii hai...!!

Tere dil kii ye jo uljhan bhi, kai baar saaf dikhti hai.n
Jo khinchi hai dil mei.n tere, wo diiwaar saaf dikhti hai

Wo ab bhi naam pukarte to hai.n mera kabhi kabhi
Par uss awaaz mei.n hai , jo daraar saaf dikhti hai

Kitni muskurahate.n oDe, muddato.n mei.n aaya hai,
Uske daaman mei.n chhupi, ek dhaar saaf dikhti hai

Wo kya kisi ko sunaayega, ab apne gham-e-hayaat
Jiske rukh pe dasht-e-qudrat ki, afakaar saaf dikhti hai

Tera qatil bhi shamil hai ‘aamir’ tamashbiino.n mei.n
Us jharoke mei.n, chashm-e-gunahgar saaf dikhti hai

Dil mere....!!!

Mujhse nahi.n tujhko chahat dil mere
Jo tuune paali ishq kii illat dil mere

Dekhoge kya kya alaamat dil mere
Abhi to hai aaghaz-e-ulfat dil mere

Meri khabar lete nahi.n jabse gaye
Ho gaye ho be-muravvat Dil mere,

kya tuune bhi kabhi ye dhun suni
Ye Nawa-e-gham-e-furqat dil mere

Tera kya, tuu waha.n hai pur-suku.n
Mai.n hii guzra dour-e-aziyat dil mere

**********
Alaamat=omen
Aaghaz-e-ulfat = Beginning Of Love
Nawa-e--gham-e-furqat= sound of sorrow of separation.
Pur-suku.n=relaxed
Dour-e-aziyat=period of torture

Baat kar...!!!

Ab na uss khushi ke tarane kii baat kar
Na mujh se beraham zamane kii baat kar

Har chot pe jo cheDta hai ek naya hii geet
Dard mei.n duube uss diiwane kii baat kar

Kab tak tu jalega aatish-e-khamosh mei.n
Ab to na iss lapat ko dabaane kii baat kar

Sooq-e-khushi mei.n mera nahi.n rasook
Chalta hai to dasht-o-viirane kii baat kar

Mujhko koi aahat ab paresha.n nahi karti
Tuu aane kii baat kar ya jaane kii baat kar

Gungunaatii raate.n...!!!

Suhaane sapne sii wo jagmagati raate.n
Madhoshi mei.n duubi gungunati rate.n

Mujhko cheD cheD muskurati rate.n
Har roaz meri neend churaati rate.n

Kitni shariir adaye.n thi unn raato.n kii
Aaj bhi isharo.n se hai.n bulaati rate.n

Sawal ka diya kuch iss ada se jawab
apne da.nto se yu.n honth dabati rate.n

jinki mehak kahi.n kar gayi hai ghar
wo raat kii rani sii madmaati rate.n

jab khoya rehta hu.n unke khayal mei.n
houle se dabe paw.n hai.n aati rate.n

“aamir” ko jo deta thoDa sa ilm-e-ghaib
jaan leta oar kya kya hai.n dikhati rate.n

Sahar tak jiine ka wadaa na - lo mujhse...

Sahar tak jiine ka wada na-lo mujhse

shikwe jitne bhi hai.n, kar dalo mujhse

Mai.n bhi ek uljha sa insa.n hu.n tumsa

itni behtar ummeedei.n na palo mujhse

Mere paas oar kya hai saariq jo le jaoge
Yu.n karo mujh ko hii Churalo mujhse

Teri ghami dekh ke ro na paDu.n kahi.n
Jazba-e-dil ko is baar chhupalo mujhse

Meri aakhiri hichki hai muskurao to sahi
Itni to chalo dushmani nibhalo mujhse

Ye raat kitni be-noor lagti hai....

ye raat kitni be-noor lagti hai
sehar bhi door-door lagti hai,

waqt ruka hai ,ya mai.n pagal
koi to wajah zaroor lagti hai

itni talkhi sii hai sa.nso mei.n
ye zindgi nasoor lagti hai

wo baat jispe gile hazaar rahe
ab kyo.n be-qasoor lagti hai

nee.nd se bojhal si meri nazar
kyo.n tumhe makhmoor lagti hai

Chand Ghazle.n merii bhi paDaa karoge tum...

Mai.n na rahaa to yaad phir kise karoge tum

Meri khalaa ko bazm mei.n kaise bharoge tum

Tumko qasam hai ke purane sanduuk se
Chand ghazle.n meri bhi paDaa karoge tum

Hatho kii chhaap meri jo lagi diwar par
Holi ke aabi-rang ab na mitoge tum

Kya meri yaad aayegi batao to sahi

Eid ke din sabse jab gale miloge tum

Mana ke qabil na raha “Aamir”, to kya
Haq jo hai dosti ka, ada karoge tum

Dard manaaye.nge sahar hone tak....

is qadar ashk bahaye.nge sahar hone tak

ab to ham jaan se jaye.nge sahar hone tak

inko paDne kii jurrat yehi kar pate hai.n sitare

meri aankho.n mei.n jhanke.nge sehar hone tak

aaj kii raat shehar mei.n kyo.n charagha hai

kitna ghabraye phire.nge sahar hone tak

majlise.n sajti rahi.n aaj wo jo aaye hai.n

haath siine pe hii rakkhe.nge sahar hone tak

Raat amawas ki ho ya gun-gunaye chandni

phir se ham dard manaye.nge sahar hone tak

Jab tasavvur mei.n koii shakl basa_lii jaaye..

Jab tasavvur mei.n koi shakl basa_ lii jaye
Kis tarah daulat-e-dida-e-tar sambhali jaye

Mujhse gham, oar mei.n paresha.n un se
Ab khushi se Milne kii koi raah nikaali jaye

Kis_se kahu.n ke kitna raha azeez wo rukh
Sajde karne jaha.n tere kaan kii baali jaye

Chhup chhup ke dost waar karta hai yu.n
Kahi.n dileri mei.n koi waar na khaali jaye

Usne pukara bhi kuchh is nazar andaazii se
Raah mei.n jaise kabhi aankh churaali jaye

Dil ko samjhayaa kaise kaise....

Tum se milne kii taDap ko dabaya kaise kaise
Tum Kya jano iss dil ko samjhaya kaise kaise

Apni ruuh ko qaid se chuDaya kaise kaise
Apne Dil ka ye Karz chukaya kaise kaise

Jism ghayal oar shahar mei.n tuufan-e-ghadar
Na puuchho ku-e-yaar tak aaya kaise kaise

Teri ruswaai ko dekhu, ke shoq-o-huDak apni
Main.e in uljhano.n ko suljhaya kaise kaise

Teri laparvah ada hui, oar meri ja.n pe aa bani
Ho rahe hai.n manzar ye numaya kaise kaise

tujhko dekhaa to janaa...!!

Tujhko dekha to manaa, ke rab hai koi
Shukr hai, uzr-e-zindgi, to ab hai koi

Raat baqi hai, oar baqi ghazab hai koi
Teri zulfoN ke bikharne ka sabab hai koi

Mera jo aangan, chamkta hai mahtab sa
Aatish-e-husn hai ya chiragh-e-shab hai koi

Sarka jo rukh se hariiri naqab iradatan
Keh dala sher maine bhi besabab hai koi

Jhapki nahi.n aankh tere intezar mei.n
Diiwana hu.n ya husn-e-talab hai koi

Aankhe.n na rahe.ngii...

Jinse gilaa hai tujh ko wo aahe.n na rahe.ngi
TaDpega husn kitna jo nigahe.n na rahe.ngi

Ab aasmaa.n ko tuune siitaro.n bhar diya
Qayam-e-Jazbat ko Panaahe.n na rahe.ngi

Khushbu-e-chaman bhaatii hai mujhko khoob
Jabse khabar lagi hai, ye saanse.n na rahe.ngi

Manzil abhi hai duur , zaraa de amal pe zor
Qahar-e-tuufa.n uthaa to ye rahe.n na rahe.ngi

Ashqo.n ki chilman se zaraa, nihar lu.n tujhe
Jis qadr rota hu.n, meri ankhe.n na rahe.ngi

Lafzo.n se rishtaa...

Lafzo.n se mera rishta bada purana hai..
shaam hote hii meri ungliya machalti hai.n
Terii chooDi ke tarah khankte hai.n
Lafz aake mere kano.n mei.n chahkte hai.n
Mere aahat wo bhi pehchanti hai
Qalam khud ba khud karwate.n badalti hai.
Mai.n majboor hu.n…
Lafzo.n se mera rishta bada purana hai....

Ghamo.n mei.n barqat hai...

hum bhoolna chahe, wo badte jate hai,
mere dil ko unke ghamo.n se ulfat hai.

abke wo milenge to unse kahe.nge,
ke tere ghamo.n mei.n badi barqat hai,

Rehmat-e-Khudaa

suhane dino.n ki sada yaad aayi
be-ghairat qismat ki ada yaad aai

in dino.n se to achche thye wo zamaane
abki baharo.n mei.n, hansti khiza.n yaad aayee

saare jahan se ho ke mayoos mujhe
aaj phir rahmat-e-khuda yaad aayee.

Jo ye din dekhe..

kyo.n ishq hamne kiya jo ye din dekhe
kyo.n unke liye jiya jo ye din dekhe

kahi.n bhi rahe.n dosto.n ko yaad Karen.ge
tumhara bada shukriya jo ye din dekhe

hum to tere khumar mei.n, khush rahte the

aisa kya hamne kiya jo ye din dekhe

Abhi ek oar ghar baaqi hai....

Mere dil mei.n to ishq ka zahar baqi hai.
Mud ke aa tuu bhi, pyar agar baqi hai,


Phalak too bijilya.n oar girati kyo.n nahi.n
Shahar mei.n abhi ek oar ghar baqi hai


Sabhi ro diye kyo.n meri dasta.n sunke
Lagta hai abhi aah mei.n asar baqi hai



Ruk ruk ke chaloge to kaise chalega
Qadam badao bada lamba safar baqi hai


Sare aansu-o.n ko na lutao ‘aamir’
Raat baqi hai, abhi gham ki sahar baqi hai

Ghar ChoD ke wo jo jaata hai..

Ghar chod ke, Wo jo jaata hai
mera dil nikal nikal ke jaata hai

hath to uth-te hai.n, rokne ko
lab pe alfaaz nahi.n aata hai.

*****
mann kahe, chupke se,kuchh esa ho jaye
aaj naa jaye wo bas aaj ruk jaye

Kanto.n se kaise, hum tanhaii ko siyenge
Mera gul-e-dilbar to chala jata hai.

*****
Dil chuur hota hai, ye soach ke, dekho!
Jaane ka naam tum na baar baar lo

Yaad hai !! mujhe hamsaaya kaha tha
Saya bhala kabhi jism se juda hota hai

*****
Meri mano to isko bhi saath liye jao
Is gham-e-ulfat ko na chhod ke jao

Haay Kaise beetengi waqt ki dushwariya.n
Kyo.n na aaj, ye waqt thahar jaata hai.

Phir se jalaya kyo.nkar...

Zindgi ko phir-se is maqaam pe laya kyo.n kar
Bujha charaagh tha phir-se Jalaya kyo.n kar

Jaan to lena tha ke hum mowafiq hai.n ke nahi.n
Tuune aakhir iss gham ko banaya kyo.n-kar

Kai din se qadmo.n mei.n kuchh chubhan sii hai
Dil ke tukdo ko rah mei.n bichhya kyo.n-kar

Hum jii rahe they, isi ghaflat umr kat jaati
Wo bevafaa afsana tumne sunaya kyo.n-kar

Zindgi ke andhere mei.n koi saath nahi.n hota
Phir chale sath kab tak, mera saya kyo.n-kar

Dar raha na kashaana koi...

sab jaa chukaa tha, dar raha na kashaana koi
ashko.n se bhigone ko dekhta tha shaana koi

bhatakta hua aa-pahoncha hu.n ku-e-dost tak
purane zakhmo.n kii ab naa yaad dilana koi.

Aah!! phool jitney miley sab khar-daar they
Chubhte hai.n bohot palko.n se naa uthana koi

Barish ke paani se bach bach ke chalta hu.n
Yaad aa jaye nahi.n, guzra zamana koi

Mera asbaab-e-mal-o-asbaab dekh na jana
Nikla hu.n ke mil jaye ab thikaana koi.

Aaj meraa zard ...

“Aaj” mera zard ho to kya na chahoge mujhe ?
Yaa bas Chashm-e-mayaguun se dekhoge mujhe
***
Har-ek shaks aaya meri mehfil mei.n ba-shart

Tum mujhe apna na kahoge, na sarahoge mujhe

***

Zabt-e-junuun ki ye had kaha.n dekhoge.

Wo jaa raha hoga, oar muskurata paoge mujhe

***

Abhi Waqt hii kya hai, wo loat aayega

Kab talak ai mere dil, tasalli doge mujhe

***

sabne kaha, itlaaf-e-zindgi, kabhi ujaar-e-zindgi

kabhi to ahle duniya, insaa.n kahoge mujhe.

***
Mei.n to tujhse kabhi juda hua hii nahi.n
Mujhko ruswa karoge, gar aawaz doge mujhe.

---------------------------
(Chashm-e-mayaguun= Intoxicating Eyes)
(Zabt-e-junuun=self control)
(itlaaf-e-zindgi=loss of life, Ujaar-e-zindgi=waste of life)

Manzar angaro.n ka...

Khwaab mei.n dekha hai phir manzar angaro.n ka
Kaghaz ka safeena oar samandar angaro.n ka

Kahdo mujhko aakhir kyo.n ho dar angaro.n ka
Mera nagar aag ka dariya, aor ghar angaro.n ka

Mai.n kya jaanu.n nikla tha kiski talaash mei.n
Aake siine pe gira jo, ye nishtar angaro.n ka

Neend tuujhe bhi aayegi, khwab suhane aayenge
Raakh tera bas hone ko hai, ye bistar angaro.n ka

Yaad bohot hii aaye.nge jitne ahal-e-jouhar they
Chehra jinka moam sa tha, Dil andar angaro.n ka
***********
Safeena=boat
Nishtar= lancet
Ahal-e-jouhar= Intelligent people

Kavish..!!

Iss jaha.n mei.n mere aashaane bohot kam hai
Iss tuute dil ke liye thikaane bohot kam hai.n

Tuu jo ruuth gaya to ek oar aas tuutegi
Mere jiine ke ab bahaane bohot kam hai.n

Meri tanhaaiya.n..

Mera piichha kyo.n kare hai.n rounaq-o- ranaiya.n
Kis moD pe rah gayi.n deku.n meri tanhaiya.n

Yaad hai mujhko guzre hai.n din kai eise kaThin
Mai.n akela hu.n khaDa oar saikDo.n parchhaiya.n

Teri aamad oar mai.n ho gaya ek khamosh but
Meri ghazlo.n se kahi.n tujhko na ho.n ruswaiya.n

Teri nazar jab jab paDi mujhpe to taDpa hu.n bohot
Zindgi tuu phir se kyo.n hai le rahi angDaiya.n

Soaz-e-suruur-e-gham kii hai ummeed bar_qaraar
Ab oar bhi kya laye.ngi abke baras purwaaiya.n

TaDap taDap key yu.n kis umr tak jiye.nge ham
Aaye din bechainiya.n, har Nasf_shab betaabiya.n

Tera mijaaz kab se ‘aamir’ shayrana ho gaya
Ke khwab mei.n bhi aaye hai.n Khayyam ki rubaaiya.n

Puuchhte ho ke haal kaisa hai...

Ye tumhara sawaal kaisa hai
Puuchhte ho ke haal kaisa hai

Uss pal thi kyo.n teri soach gum
Ab tujh ko malaal kaisa hai

Ulajhe se hai.n ham jaane kaha.n
Ye roaz-e-visaal kaisa hai

Mere dil mei.n to ishq zinda hai
Tere dil mei.n khayal kaisa hai

Kahate they jaao meri bala se tum
Ab ye ashk-e-shalaal kaisa hai

Aaj wo sharminda hai, dekho to
Us Khuda ka kamaal kaisa hai

Kya wo hai yahi.n kahi.n ‘aamir’
zakhmo.n mei.n ubaal kaisa hai
******

Shalaal=Waterfall
Visaal = Meeting

Talkh kahaani meri...

Mujh se mat puuchh tu talkh kahaani meri
Masal ke rakh di thi jisne zindgaani meri

Fanaa karke mujhe tumhi maruuf ho jao
Kuchh to kaam aajaye hasti-e-faani meri

Wo aaye hai.n oar meri mizaaj pursish ko
Zara dekhiye aankho.n mei.n hairani meri

Itni si baat pe kyo.n tum pashema.n raho
Bhuul jaao wo ek chhoti si qurbaani meri

Khouf-e-viraanapan mujhe kitna darata tha
Ab samajhta hu.n wo thi ek nadaani meri

Aks dekhta kyo.n hai...

Jo tujhe chhoD chale unko pukaarta kyo.n hai
Behate paani mei.n bata aks dekhta kyo.n hai

Aaiina tuuta hua, tujhe kya se kya bana dega
Sach bata yu.n mujh mei.n Jha.nkta kyo.n hai

mera jawaab tujhe ab us baat ko ek arsah hua
Wo sawaal ab-bhi mujh mei.n guunjta kyo.n hai

Na uska aashiya.n raha na ab wo shajar kahi.n
Aadhi raat mei.n ye pari.nda chehkta kyo.n hai

Oar koi kehde mujhse ‘aamir’ tuu aarzu apni
Ye Ibtisaam-o-ha.nsi mujhse maangta kyo.n hai

Guzre tere kuuche se...

Guzre tere kuuche se kitna sambhal sambhal ke
Phir bhi na maane aansu chhalke machal machal ke

Mai.n bhi to khamoshi se ye manzar dekhta hu.n
Phir unko roakta hai kyo.n dil nikal nikal ke

Kabhi bandish-e-biida, kabhi chahat-o-ulfat
Ye Zindgi pukaare chehre badal badal ke

Likkha to ek sa hai paDo suurate.n kabhi bhi
Mayne kyo.n hai.n badle apne amal amal ke

Umra paDi hai ‘aamir’ marne kii baat kyo phir
Dil rah gaya hai mera dekho dahal dahal ke

Wohi insaani bate.n...

Tuu bhi dil mere karne laga hai sayaani bate.n
Mujhse kehta hai bhula du.n wo puraani bate.n

Jo mere lafz loate to sadaa matlab badal gaye
Muskuraya karta hu.n sunke ye sailaani bate.n

Yaad to aaya hoga tujhe wo dariicha kabhi kabhi
Karte they jaha.n paharo.n ham deewaani baate.n

Koi roako to mujhe ke itna bhi koi behakta hai
Kabhi anjaani bate.n to kabhi be-maani baate.n

Tumse garmjoshi ki ummeed kabhi thi bhi nahi.n
Par eisi bhi kyo.n karte ho barfaani baate.n

Ye na-muraad roag kab se laga ‘aamir’ ye bata
Tuu bhi karne laga hai ab wohi insaani bate.n

Faasla baaqi hai abhi...

Mere iss dard ka silsilaa baqi hai abhi
Dil mei.n magar housalaa baaqi hai abhi

In parindo.n kii parwaaz bata rahi hai ye
Ke ek oar koi zalzalaa baaqi hai abhi

Kis ke sahaare hai ye dharti tiki hui,
Lagta hai ke sach kii balaa baaqi hai abhi

Kyo.n mere dil mei.n ek hook utthi hai
Koi to chashm-e-mubtalaa baaqi hai abhi

Mehfil tamaam karte ho zara suno munsif
Mere gunaaho.n ka faisalaa baaqi hai abhi

Kuchh din oar yu.n hii apna faasla rahe
Ekhlaas ka ek bulbulaa baaqi hai abhi

Teri ye uljhan ‘aamir’ bayaan karti hai
Dil-o-dimaagh ka wo faaslaa baaqi hai abhi

Chaandi kii zuba.n..

Pyaar ke bol ab koun yaha.n suntaa hai
Ye zamana to chaandi kii zuba.n suntaa hai

Wo waqif tha ke teraa jawaab kya hoga
Suntaa hai to tarz-e-baya.n suntaa hai

Barso.n se khamosh wo akela shajar
Bas guzarte hue karwaa.n suntaa hai

Uss bewa ke bhuke bachcho.n kii pukaar
Zami.n sunti hai na aasma.n suntaa hai

Tum bewafaaii ka hoale se zaraa zikr karo
Ye haadse to dil-e-natwa.n suntaa hai

Koi vaardaat hoti hai...

Jab mere dil ki mujh se baat hoti hai

Raat se subah, subah se raat hoti hai.

***

Zindgi bazi-e-wahshat kii bisaat hoti hai

Jazbato.n mei.n bhi sheh ya maat hoti hai

***

Khud ko samajhne mein lage itne zamane

Bahot kam dosto.n se mulaqat hoti hai.

***

Kyo.n aata hai baar baar zikr-e-tanhai

Mere sang yado.n kii ek jamaat hoti hai

***

Dam bhi nikale uska to awaaz na nikle

Rasan-war* ki bass ye ahtiyaat hoti hai

***

hu.n mai.n khalwat-o-bekalii ka mureed

Kya jaanu.n, kya rasm-e-hayaat hoti hai

***

Ka.npta hu.n mustaqbil soach kar apna

Kuu-e-diigar jo koii vaardaat hoti hai

***

Jamaat=team

Rasan-war=used for 'hangman' here

*Khalwat=isolation

Bekalii=restlessness

Hayaat=life

Mustaqbil=future

Kuu-e-diigar=others' street

Ek Shayar tha...

Ek shayar tha, uske ghar mei.n kya mila
Ek bistar silwate.n, bhiiga hua takiya mila

Ek mera dil hii tha jo tha apna hamkhyal
Dekhiye wo dost bhi, dushmano.n se ja mila

Dard-shanaasa, fughaan-e-aalam, Huuk-wali
Har shahar mei.n, ek naam mujhe naya mila

Us ke jazbato.n ko na bahr-e-fanaa kahi.n
Aankho.n mei.n jiski ek thahra hua dariya mila

Pehchan kise, oar maraasim ka kya saval
Mujhko to jo bhi shaks mila, Behruupiya mila
*****
Fughaan=tears of pain
Dard shanaasa=who is familiar with pain

Ek khamosh sa lamha hu.n...

Ek khamosh sa lamha hu.n guzar jau.nga
Chaand sitaro.n ki, kisi rahguzar jau.nga

Thaam bhi le tuufan-e-havadis e khuda,
Tuuti hui nafs-o-ja.n hu.n, bikhar jau.nga

Baitha hu.n bas ek sehar kii aas lagi,
Ghup andhera hai, andhere mei.n kidhar jau.nga

Tum kyo.n subakte ho mere gham-e-hayat
Saath le jau.nga tumhe, mai.n agar jau.nga

Na roako, mujhe apni ghami sunane ko
Bohot thak chala hu.n, ke ab ghar jau.nga
******

Havadis=misfortunes
Nafs= soul

Kya aise taakta hai o aasma.n mujhe...

Kya aise taa_kta hai, o aasma.n mujhe
Pahle nahi.n dekha kya paresha.n mujhe

Kaha.n wo gulista.n, kaha.n jangal babool ke
Waqt laya hai ye kaha.n se kaha.n mujhe

Dour chahe ghami ka, ya shaadmaan ho
Paoge tal-e-darakht yahi.n giriya.n mujhe

Naam leke tera uth_ti hai.n Jo jaanib meri

Chubhti hai.n siine mei.n wo ungliya.n mujhe

Chhup raha jis roaz, kaf-e-khaak oat mei.n
Chahoge to bhi, Dhuundoge phir kaha.n mujhe
***
Shaadmaan=happy
Kaf-e-khaak= some dust

Noor...!!

tum ne jaha.n likha wo kaghaz kaha.n raha..

rango.n ka ashiyana wo kaghaz kaha.n raha..

***

uss warq pe jo teri qalam bahi to kyaa kahe.n

uss mei.n mera aks dikha wo kaghaz kaha.n raha..

Iss baar kii barish...

Mere sulagte dil pe koi pyaar ki barish
Layee hai naya rang iss baar ki barish

Hum bhi karte rahe.n izhaar ki barish
Tum barsaate raho jana.n iqraar ki barish

Is mehfil ka nahi.n koi anjam ai “aamir”
Yu.n hi chalti rahe ye ash-aar ki barish

Yado.n ke panchhii...

Khushk honth mere oar ashk zar zar behte hai.n
Kya batau.n tumhe mujhse kya kya kahte hai.n
***
ud ud ke loat aate hai.n, hame.n sone nahi.n dete
teri yado.n ke panchchhi mere chhajje pe rehte hai.n
***
Masruuf shahar hai, yu.n to koi na puuchhega pataa
koi poochhe to kah dena, unki chahat mei.n rahte hai.n

***

Kahaa kyaa hai..

Tum ye jo kahte ho ke abhi kaha kya hai

Zara nazro.n kii suno , kahne ko raha kya hai

******
Zamaane bhar mei.n deevano.n se phira karte hai.n

Tere khwabo.n mei.n bhii aa jaye.n to khata kya hai

Duniya e hasrat e dil...

Duniya e-hasrate dil suuni tere baghair
Har rang shoq-o-mehfil suuni tere baghair

Tuu nahi.n to har simt viiraana hai
Meri har-ek manzil suuni tere baghair

Gham mujh pe hanste hai.n...

Tujhe dekhne ko jaana hum jitna tarste hai.n
Naghme ye rote rote mere dil se barste hai.n

Jin ko siine se lagaya tha umr bhar ke liye
Wo hi gham aaj mujh pe hanste hai.n

Teri Suurat...

Roz jab bhi ye sham dhalti hai
Apni tabiyat nahi.n sambhalti hai

Unko dekhu.n to aa jaye qaraar
Nazar ziddi hai, ye machalti hai

Koun kehta hai, tumsa nahi.n zamane mei.n,
Teri suurat tere aaine se milti hai

Aankhe.n patthar ho gayi.n..

Aankhe.n patthar ho gayi.n , ansu dhua.n hue
E dil tere chahne wale to they, kya hue

Khwab jitney dekhe they sunhare rang ke,
Mere khuda bata, kyo.n sab syah syah hue

Mai.n bhi to dekho khud se juda-juda raha
Jab se mere pyare tum mujhse juda hue

Tuute dil sii, awaaz bhi to tuut gayi
Ashk-e-gham se hii afsaane baya.n hue

Chaand jaise badnuma saa lagta hai
Tere bin sitare bhi to syah syah hue

Bure waqt mei.n zuba.n bhi saath nahi.n deti
Alfaaz kuchh kahe, oar kuchh baya.n hue

Jo apne hokar bhi rahe kachchi neend ke sapne
Raat bhar mile oar din mei.n juda hue

Muh chuupa ke ro diye....

Wahshat hui ye kaisi, ghabra ke ro diye
Apna tha jata saya, dekha ke ro diye

Sar-e-rah chalte chalte kai rate.n guzar gayi.n
Ek subah manzil ko dekha ke ro diye

Yu.n apne gham bohot they, ta-umr rone ko
Kisii ki suni aah to, karah ke ro diye

Kuchh na kah sake Mahv-e-safar se hum
Fasiil-e-shahar ko, ungli utha ke ro diye

Sang Rone waale ke zamaana nahi.n rota
Socha, oar muh chhupa ke ro diye


************
Mahv-e-safar= Traveller
Fasiil-e-shahar= wall of city

Wo Behis khaDa tha...

Usne aansu piye they barso.n tak
Jab wo roya to roya sadiyo.n tak

Unn ashko.n ko kab tak roke.n
Jo aake thame hai.n palko.n tak

Safar arsah-e-hayaat hai ye
Tere wado.n se teri yado.n tak

Tumhi le jao pagham-e-shafaq
Tumari pohon.ch hai mahalo.n tak

Khoob dekhi husn-e-talaafi teri
Ashk bhi aaye nahi.n ankho.n tak

Tum to dil ki kahke chale aaye
Wo behis khada tha pahro.n tak
--------------------

Arsah-e- Hayaat=Lifetime
pagham-e-shafaq= message for favour
Husn-e-talaafii=Beautiful Way Of Forgiveness
Behis= stunned, shocked

Wo Aashiya.n...

Tinke tinke chunke Jis ghar ko banaya tha,
Jis khwab ko hazaro.n rango.n se sajaya tha

Wo aashiya.n jise bade dil se banaya tha
Jabr-e-musalsal barso.n, aman kada paya tha

Lahoo se siincha tha jiss darkht ko aamir
Hay !! kyo.n mera saya na ban paya tha


-------------------------
Jabr-e-musalsal= Continuous Striving
aman kada= House Of Jasmine Flowers

Hichkiya.n....

Itna bhi kyo.n tumne yaad kiya mujhko

Umr bhar aati rahi.n jo hichkiya mujhko

------------

Wo jo chale ke pan_pe aalam se raabta

Paaya hamesha Pakh-e-darmiya.n mujhko

-------------

Uss din khuli thi jo boo-e-ishk ke liye

Reh reh ke bulati hai.n wohi khidkiya.n mujhko

-------------

Jinse Chhupaate the_y tere gajre ke phoolo.n ko

Kitna ChiDatii hai.n wohi titliya.n mujhko

------------------

Oar nahi.n jo zamane mei.n chahne wala

Kyo.n na farhat-za ho meri tanhaiya.n mujhko

------------------

Sirf-uss talkh lamhe ko yaad na kar “aamir"

uss zaalim ne Ekhlaas bhi bohot diya mujhko

-----------------------

(pakh=obstacle, raabta =relation, Ekhlaas = love, farhat-za= adorable)

kya tujhe aaj bhi yaad hai...

kya tujhe aaj bhi yaad hai
sabse pahle mile they kaha.n
kab kiya tha izhar-e – mohabbat mai.ne

sabse pahle kya likha tha maine tujhko
sabse pahla mera tohfa kyat ha

wo jo din raat hum tadapte they
baat karne ko jab hichakte they
phir bhi roz milna chahte they
taro.n ke saath jagte they

kaon se din the hamare mahke mahke se
oar koun se din apne dahke they

kis din hum hanste hanste roye the
kis roz apne aansuo.n pe hanse the hum

kya apne rishto.n mei.n wo hii chamak baaki hai
ek dooje ke liye wo hi kasak baaki hai

aao uss waqfe ko phir se yaad kare.n
oar phir naye ishq ka aaghaaz kare.n

Shaakh se Tuuta....

Zinda hu.n jab tak khuda kaa aasraa rahe
Shaakh se tuuta patta kab tak haraa rahe

Zindgi meri bhale khwar ho, na-daar ho
Dair-e-raqiib, to khushi se Bharaa rahe

Chahat –e-Dard ki illat padi hai yu.n
Dard-e-dil rahe par zara zaraa rahe

Gham ne, mere dil pe qabza kya hai kul
Fikr-o- khayal kaise, yaha.n duusraa rahe

Zindgi tujhse mai.n bhagta hu.n yu.n
Apne hi saye se koi bachcha Daraa rahe
---------------------
Na-daar=poor

Taghaful.....

********

*****

Iss taghaful se kyo.n dil tuuta hai
Jo tujhe ghair kahe jhootha hai

Yahi.n sham dekhi oar savere dekhe
Ziindgi ke ujaale oar andhere dekhe
Jo tujhe ghair kahe jhootha hai

Jo Gujarat Jala tuu na soya tha
Kashmir ke halat pe, na roya tha ?
Jo tujhe ghair kahe jhootha hai

Parstish ke, tarane aman ke
Tune bhi gaye tarane watan ke
Jo tujhe ghair kahe jhootha hai

Jitna tuu janta hai, Allah ke naam ko
Utna hii pada hai tuune Raam ko
Jo tujhe ghair kahe jhootha hai

Mulq apna, dost apne hai.n
apno se kyo.n rootha hai
Jo tujhe ghair kahe jhootha hai

naqsh-e-pai miTata raha....

apne Sair-e-Zindgi sab nibhata raha
Aatish-e-pinha.n thi, wo jalata raha

Teri suurat kitna daraati hai Zindgi
Tujhko naqabo.n mei.n Chhupata raha


Raah itni kathin hogi socha na tha
Ruk ruk ke naqsh-e-pai miTata raha


Jan kar Talkhii-e-zindgi hii haqiqat hai
Jo bhi tha, Dil ka malal jata raha


-----------------------
Sair-e-zindgi=duties of life
Aatish-e-pinha.n=hidden fire
Naqsh-e-pai=footprints
Talkhii-e-zindgi=bitterness of life

Sust - rau....

Zamane kii raftaar bohot tez hai mujhse
Mai.n tum sab ke saath na chal pau.nga
ek Sust - rau hu.n mai.n
aaj ke zamane mei.n


Yahi.n iss zareef darkht ke neeche choD jao mujhko
Yahi.n Chabutre par baitha sustaunga kuchh

Dekhu.nga nai naslo.n ko baDte hue
Koi Salam hoga to
Dua yahi.n se duunga,
Hath hila kar , duur tak jaata dekhu.nga sabko.

Yaad karu.nga yahi.n baitha
Apne bachpan ko,
Har subah jab mai.n bhi udta tha
Bilkul be-wajah sach mei.n

Ye peD tab naya sa tha
Isko tab bhi mei.n apna sa samajhta tha


Mujhe yahi.n choD do iss Zareef Darkht ke neeche
Mera hum-umr yahi to hai….
----------------------------------
Sust - rau = slow speed

Gumsum...

Kucch kehna chahta hu.n
Magar kuchh oar kehta hu.n

Apne hii ghar mei.n kyo.n
gumsum sa rehata hu.n

ye mujh se na puuchho tum
kyo.n madhosh phirta hu.n

Asr-e-visaal hai ye to,
tumse ye raaz kahta hu.n

Dard...

Siine mei.n dard sa rehta kyo.n hai
Oar phir itni karvate.n leta kyo.n hai


Uff uska andaz-e-takalluf to dekhna
Dua–e-Shifa-e-Dard bhi deta kyo.n hai


Mai.n khush hu.n ke afsos-zada rahu.n
Har waqt qatra-e-diid ye behta kyo.n hai


Usko shikwa bas yehi raha mujhse
Koi shikwa hai tujhe, to kehta kyo.n hai


Ab Teri khata kahu.n, ya ameer-e-shahar kii
Dard hota hai agar itna to sehta kyo.n hai

Musafir...

Khayalo.n ke kuchh musafir aate hai.n
Ek saraay hai, zehan kii waha.n Theharte hai.n


Kuchh aage baD jate hai.n, apne raste,
Kuchh yahi.n basawat karte hai.n,
Yahi.n reh jaate hai.n

Wo musafir phir dheere dheere,
Apne se ho jate hai.n

Bekhayali mei.n wo musafir khayal,
Meri zuba.n ho jate hai.n

Pakiiza rukh ...

Paakiiza rukh hai jiska shiimaab sa
Usko paya dil mera mehka gulaab sa

Ada to dekhiye bismil hue hai.n sab
Koi nahi.n mehfil mei.n in janaab sa

Zulf bhiigi hui jo shano.n pe aayi hai
Ek Khumar chaD gaya jaise sharaab sa

Jisne nahi.n paDa, kuchh to kho diya
Chehra lage hai uska sadiq kitaab sa

Jis roaz teri ek jhalak bhi na pa saka
Wo din mujhe laga tha ghark-e-azaab sa

Hamaaqat kaho junuun kaho maftoon kaho
Mera dil-e-makhmoor hai qamyaab sa

Aaj mehfil aashiqana jo hui ‘aamir’
Tere siine mei.n bhi utha ek sailab sa

Nithari...

insaniyat par daagh...

Haay mai.n kaha.n tha jab wo masoom cheekhte ho.nge
Uss haivaniyat ke haath jab khoon se sane ho.nge

Kya wo deevare.n bhi larazi ho.ngi
Wo chhate.n bhi charmarai ho.ngi
Jab wo ghighyati awaaze.n
Unse takraai ho.ngi
Haay uss shaitan ke kya haath na ka.npe ho.nge
Jab wo nazuk gale usne rete ho.nge

Haay mai.n kaha.n tha jab wo masoom cheekhte ho.nge
Uss haivaniyat ke haath jab khoon se sane ho.nge

Chhatpataate hue jin bachcho.n ne dam toDa hoga
Unki mao.n ne kaha.n kaha.n apne lalo.n ko dhunda hoga
Haay abhi to yahi.n khelta tha !!
Kah kah ke chhaati ko peeta hoga !!
Haay apne nanho.n ke kapDe utha utha ke kaise Dekhe ho.nge

Haay mai.n kaha.n tha jab wo masoom cheekhte ho.nge
Uss haivaniyat ke haath jab khoon se sane ho.nge

Ya ilahi tuu bhi apni khudaii pe khoob hii roya hoga
Ye manzar dekh ke tuu bhi to taDpa hoga
Tere farishte bhi tab se khamosh se rehte ho.nge

Haay mai.n kaha.n tha jab wo masoom cheekhte ho.nge
Uss haivaniyat ke haath jab khoon se sane ho.nge

Maraasim...

Teri yaado.n ke siwa mujhe kuchh aata nahi.n to kya
Ye Maraasim to wahi.n hai.n, tuu nibhata nahi.n to kya

Ye ashq-o-malaal zinda mere zehan ko rakhta hai
Mere siine kii koi aag jo bujhaata nahi.n to kya

Saari baate.n uske chehre ka libaas kehta hai
Apne ahsaas-e-pinha.n wo jatataa nahi.n to kya

Dard usko bhi hua lakarhaare uski chiikh sun
Ped chandan ka gar chhat-patataa nahi.n to kya

Tujh ko ‘aamir’ usne quvvate.n tamam bakhshi hai.n
Tuu jo kabhi khud ko aazmataa nahi.n to kya

Guzre hue lamhe...

Guzre hue lamho.n ke warq kholta mila
Jo bhi mila mujh mei.n kami tatolta mila

Jiske haatho.n mei.n kabhi phuul de ke aaya tha
wo Dast-e-paa mei.n patharo.n ko tolta mila

Jispe bharosa kiya tha wo mera chara-jaa.n
Mere ta’aam mei.n hii zahar gholta mila

Jisko kehte they aaiina-e-sanjiidgi sabhi
Sare-raah wo mast mustaqil bolta mila

Bhuula wo qasam jo tuune dii thii ‘aamir’
Aaj bhi ye dil uske hii gird dolta mila

Qafas Shehara...

Uski tasveer siine se lagataa kyo.n tha
Har shaam tuu ashq bahataa kyo.n tha

Wo parinda jiski umr thi parwaaz-o-udaan
Qafas Sunehra usko bulataa kyo.n tha

Ek musafir jo pahle kabhi mila bhi nahi.n
wo apna haal-e-dil sunataa kyo.n tha

Jo tera tha oar naa ho sakaa kabhi tera
Uska e dil tuu sog manataa kyo.n tha

Jiske diye zakhm kabhi soye hii nahi.n
Uska khyaal mujhko jagataa kyo.n tha

Khanjar liye phirta hu.n...

Dil mei.n aaj bhi wo manzar liye phirta hu.n
Apne siine mei.n ek khanjar liye phirta hu.n

Uss roaz jo ek ghoonT piyaa tha mai.ne
Rago.n mei.n ab bhi wohi zahar liye phirta hu.n

Jo suukhta bhi nahi.n oar chhalakta bhi nahi.n
Apni aankho.n mei.n wo bahar liye phirta hu.n

Tere shahar mei.n mehfooz kaha.n maal-asbaab
Ye ghanimat hii hai ke sarr liye phirta hu.n

Apne bachho.n se sambhale hai.n tere shikwe
Sang in ko shaam-o-sahar liye phirta hu.n

Jab wo tuuta to mujhe kitna apna saa laga
Tab se mutthi mei.n ye akhtar liye phirta hu.n

Oar kya hogi ‘aamir’ zabar-e-azaab ki hadd
Phir bhi mai.n khouf-e-mahshar liye phirta hu.n

Khabar nahi.n....

Mere dil ne dii sada, usne sunaa, khabar nahi.n
Mai.ne kaha tuu paas aa, usne sunaa, khabar nahi.n

Meri saans jab bhi chali, ye hi kahaa usne sada
Tuu hai meri dilrubaa, usne sunaa, khabar nahi.n

Har simt hai dhua.n dhua.n, chhai ghataa haath baDa
Tujhko khuda ka wasta, usne sunaa, khabar nahi.n

Mai.n hu.n aakhir zindgi...

Behak raha hu.n zindgi aakar zaraa tuu thaam le
Mujhko bhi dede sukuu.n tuu bhi zaraa aaraam le

Meri har ek shaam guzri uljhano.n ke saath hii
Har subah aayii hai phir ek garidh-e-ayyaam le

Mujhko de koi to namaa muh chhupa jata hai kyo.n
Aa zaraa basheer kahde aaya hai kya paighaam le

Jo sadaa-e-waqif ho to surr milaate hai.n sabhi
Wo zuba.n milti nahi.n gum-naam ka jo naam le

Kah rahi hai.n mujh se ‘aamir’ ye meri bechainiya.n
mai.n hu.n aakhir zindgii tuu to sabar se kaam le

Garidh-e-ayyam-wheel of time
Namaa-letter
Basheer-messanger
Sadaa-e-waqif –known voice

Hunar na jaaye kahi.n...

Dard ye hadd se guzar na jaaye kahi.n
Dil kii dhaDkan thahar na jaaye kahi.n

iss darja takraati hai.n aahe.n dekho
Ye aasama.n bikhar na jaaye kahi.n

Kitna dabe paa.nv subaah aatii hai
Shab-e-makhmoor darr na jaaye kahi.n

Ab bahaare.n kabhi loat ke na aaye.ngi
Meri qismat sa.nwar na jaaye kahi.n

Wo beraham khyaalo.n mei.n aate rahe
Meri ummeed marr na jaaye kahi.n

Muddate.n ho gayii.n wo choD gayaa
Par yaad-e-sitamgar na jaaye kahi.n

Hans hans ke raahjan se ye kahta raha
Apne hatho.n ka hunar na jaaye kahi.n